Oktyabrın 26-da Gürcüstanda parlament seçkiləri keçiriləcək. Bu barədə Gürcüstan Mərkəzi Seçki Komissiyası məlumat da yayıb. Lakin bəzi ehtimallar var ki, ABŞ-da keçiriləcək seçkilərlə əlaqadar Gürcüstandakı seçkilər bir qədər geriyə də çəkilə bilər. Görünən odur ki, bir neçə ay sonra Gürcüstanda Parlament seçkiləri baş tutacaq. Bu ölkədə qəbul olunmuş “Xarici təsirlərin şəffaflığı haqqında” qanundan sonra bu ilki seçkilərin daha gərgin keçəcəyi şübhəsizdir.

Bəs bu seçkilərdən Gürcüstanda yaşayan soydaşlarımız nə gözləyir, onların bu seçkilərdə mövqeyi necə olacaq?

Gürcüstan prezidentliyinə keçmiş namizəd, Gürcüstan Naminə Siyasi Partiyanın sədri Fazil Əliyev öz sosial şəbəkə hesabında bu suallara cavab verib.

Soydas.az-ın xəbərinə görə, Fazil Əliyev bildirib ki, qarşıdan gələn seçkilərlə bağlı Gürcüstan hakimiyyətinin həm iqtidar, həm də müxalifət təmsilçilərilə müəyyən məsləhətləşmələr aparıb, ümumi rəydən də xəbərdardır:

“Gürcüstan iqtidarı seçkilərdə soydaşlarımızın səsini müxtəlif vasitələrlə, eyni zamanda maliyyə və pulun da imkanlarından istifadə edərək, müxalifət isə Saakaşvili fanatları və mövcud hakimiyyətdən narazı qüvvələrin səsini almağa çalışacaqlar. Hər iki varinatda da biz Gürcüstan Türkləri öz mövqeyimizi ifadə etmiş olmuruq. Əgər Gürcüstan hakimiyyəti bizə seçkilərdə bir milli azlıq olaraq normal iştirak etmək hüququ verməsə biz öz millətimizə müraciət edərək, İranda Məsud bəy Pezeşkianın seçki texnologiyasını tətbiq edəcəyik. Yəni millətin böyük əksəriyyətini eyni cəbhədə birləşdirməyə çalışacayıq”.

Fazil Əliyev təklif etdiyi seçki texnologiyasını da açıqlayıb:

• əgər hər iki cəbhə (iqtidar və müxalifət) Gürcüstan Türklərinin maraqlarını nəzərə almasa bir toplum olaraq, seçkini boykot edəcəyik. Bu halda bütün dünya o cümlədən demokratik Avropa təşkilatları seçkinin demokratikliyini milli azlıqların hüquqları pozulduğuna görə şübhə altına ala bilər.
• iqtidar və ya müxalifətdən hansısa biri bizim təkliflərimizi qəbul etsə, qarantiya almaq şərtilə onları dəstəkləyə bilərik.

Fazil Əliyev Parlament seçkiləri öncəsi soydaşlarımız adından ümumiləşdirilmiş təkliflərini də irəli sürüb:

• 1936-cı ilə qədər olan Türk milli kimliyimizin və dəyişdirilmiş Türk toponimlərinin adları geri qaytarılmalıdır;
• yeni seçilmiş Parlament Gürcüstanda milli və dini azlıqlar haqqda yeni qanun qəbul etmək öhdəliyini götürməlidir;
• gələcəkdə seçki qanununa dəyişiklik edərək, yalnız 5% lik baryerlə Proporsional seçkilər yox, Gürcüstanda yaşayan millətlərin sayına uyğun olaraq Parlamentdə yer ayırmalı və bu yerləri həmin toplumun apolitik hissəsi, özü tərəfindən müəyyənləşməlidir.Yəni bu gün Gürcüstanda bizim milli sayımıza görə Gürcüstan Türklərinə ən azı 30 millət vəkili mandatı düşür və bu real yerinə yetirilməlidir;
• qubernator başda olmaqla bütün yerlərdə merlər, sakrebulolar hamısı praporsiya ilə milli tərkibə və saya görə seçilməlidir. Gürcü soyadı götürmüş kriptoermənilər bölgədə əhalinin 70-80% ni təşkil edən Gürcüstan Türklərinə rəhbərlik edə bilməz!...

Soydas.az