Arbitrum Vəkil Bürosunun rəhbəri Polad Mehdi ARB kanalının “Günə son” proqramında sənədsiz evlər və bələdiyyə torpaqlarından istifadədən danışıb.

Soydas.az xəbər verir ki, arb telekanalına müsahibə verən vəkil problemləri bir neçə qrupa ayırıb. Vəkil sənədsiz evlər problemin yaranmasının səbəblərini əsasən aşağıdakı kimi quruplaşdırıb:

• Müvafiq icra hakimiyyəti orqanları tərəfindən tikinti işlərinin aparılmasının qarşısının alınmaması;
• Torpaq sahələrinin bələdiyyələr tərəfindən qanunvericiliyin tələblərinə uyğun olmayan şəkildə satışının həyata keçirilməsi;
• Vətəndaşlar tərəfindən sənədsiz evlərin tikintisinə xüsusi marağın göstərilməsi.

Vəkil yaranmış bu problemin həlli üçün öz təkliflərini də verib:

• Torpaq sahələrinin bələdiyyələr tərəfindən vətəndaşların mülkiyyətinə verilməsi məsələsi tezliklə öz həllini tapmalıdır. Torpaq sahələri vətəndaşların mülkiyyətinə verildikdən sonra Şəhərsalma və tikinti məcəlləsinin 80-ci maddəsinə uyğun olaraq məlumatlandırma icraatı qaydasında evlərinə çıxarış ala biləcəklər;
•  Qanunsuz tikililərin qarşısı alınmalıdır;
• Bələdiyyə torpaqlarının mülkiyyətə verilməsinin ümumi qaydaları "Bələdiyyə torpaqlarının idarə edilməsi" haqqında 29.06.2001-ci il tarixli qanunla tənzimlənir. 2007-ci ilin noyabr ayına qədər bələdiyyələr tərəfindən torpaq sahələrinin ayrılması barədə sənədlər:

- Qərar,

-Keçmiş DTXK tərəfindən təsdiqlənmiş alqı-satqı aktı,

- Cizgi planı (Kadastr planı)

- Keçmiş DTXK tərəfindən verilmiş rəy.

2007-ci ilin noyabr ayından etibarən bələdiyyələr tərəfindən torpaq sahələri yalnız açıq torpaq hərracları vasitəsilə ayrıla bilər.

Bələdiyyənin ərazisində daimi yaşayan və eyni zamanda ən azı 5 il müddətində yaşayış yeri üzrə qeydiyyatda olan vətəndaşların mülkiyyətinə torpaq sahəsi hərracdan kənar verilə bilər,

Bələdiyyələr tərəfindən hərracla və ya hərracdan kənar ayrılmış həmin torpaq sahəsini vətəndaş 5 il müddətində özgəninkiləşdirə bilməz.

Qeyd: Bakı şəhərində hələ ki, bələdiyyə xəritəsi təsdiq edilməyib. Bələdiyyə torpaqlarının hüdudları məlum deyil.

Soydas.az